حوار مع ابليس

حوار مع ابليس
سألت ولاد الحرام قلتلهم عايز اعمل حوار مع ابليس قالولي ابعتله sms على جهنم فون او على الخط التاني بتاعه (موبينار) يمكن يرد عليك من ال private number بتاعه وفعلا عملت كده لاني كنت باشد الحاجه لعمل حوار مع ابليس وخصوصا انه هيطلع عين امه في السلاسل والتعذيب في رمضان
كتبتله رساله قلتله فيها( ازيك يابو الاباليس عامل ايه دلوقتي ...يا مان كنت عايز اعمل حوار معاك...فياريت تتصل بيا او تبعتلى كلمنى وانا اتصل بيك)
بعد ساعه كده لاقيت الموبايل بيرن وفيه ارقام غريبه عليه كده قلت اكيد هوه ...المهم رديت وقلت الو لاقيت صوت عميق اوي كده بيقولي اهلا اذيك يابوحميد كنت عايز مني ايه يا مان
• قلتله مين معايا اساسا انا معرفش مين معايا
- انا خدامك ابليس وممكن تناديني بلقبي يعني تقولي يا شيطان او تدلعني تقولي يا شوشو
* الله يلعنك ... وايه الارقام الغريبه دي
- لا عادي اصل الكود عندنا كبير شويه ... اصلي بكلمك من خط موبينار بتاعي عشان الدقيقه فيه رخيصه بصراحه وكمان عاملين لنا عرض في رمضان الدقيقه بقرشين عشان عارفين اننا هنبقى مسلسلين ومش هنعرف نتكلم في التليفون طبعا.
* هو انتو عندكو خطوط وعروض زي عندنا برضه ؟
- ايوه يا عم بس احنا معندناش جيل تالت للاسف ... داحنا كمان عندنا سنترالات وخدمات موبايل زيكو...يعني انا ابن عمى فاتح سنترال مسميه (سيئه واحده بتقربنا كلنا).
* يا سلام!
- ايوه طبعا امال احنا بنهزر....المهم ايه النظام يا مان.عاوز معصيه ولا حته من الكبائر ولا بتفكر في ذنب صغنون تفتح بيه الشهر الكريم
* ولا عايز منك اي حاجه غير شوية دردشه للمنتدى بتاعنا
- المنتدى بتاعكو ... عارفو ... على فكره كل الناس بيكرهوك في المنتدى ده وبيحقدوا عليك اسألني انا
*ماقلتلك بلاش السكه دي معايا..يعني مش لازم تقلب عيشك عليا ....ايه اخبارك في رمضان الجاي ان شاء الله؟
-ماتفكرنيش عندي اكتئاب فظيع ...بس انا مظبط شويه كده عارف انهم بيدخلوا الشهر بقلب جامد لكن بعد اسبوع ولا 10 ايام هيعيشو معايا المود ونديها فطار وسيئات واحلى اشتغالات
* باقولك يا ابليس ...بتتفرج عالتليفزيون في رمضان؟
- هو انا ورايا غيره. بس يحيي الفخراني مكانش عاجبني السنه اللى فاتت...على عكس ناديه الجندي ويسرا والهام شاهين كانوا منورين الشاشه بصراحه
* ايه رأيك في البرامج الدينيه في رمضان؟
- عاجباني موت خصوصا ان محش بيتفرج عليها من حلاوتها
*ايه رأيك في الاغاني يا نجم ؟
- لا جامده ..خصوصا الاغاني اللى ليها كليبات.. حبيايب قلبي هيفاء ونانسي وماريا وغيرهم بصراحه حاجه تطمن الواحد على نفسه في رمضان بالذات وتحسسه انه هيرجع بعديه هيلاقي حبايبه مستنيينه
* طب وايه اكتر اغنيه بتحب تسمعها؟
- حبك نار بتاعة عبد الحليم
*طب ومن الاغاني الحديثه؟
- ناري نارين بتاعة هشام عباس
*طب اكتر الافلام اللى بتحبها؟
- فيلم الهروب من الجنه بتاع فريد الاطرش و جحيم تحت الماء بتاع سمير صبري
*طب والافلام اللى مبتحبهاش؟
طبعا الافلام الدينيه زي الشيماء وكده ....بس في فيلم مش ديني و مبحبوش برضه
*هو ايه الفيلم ده؟
- فيلم (الشيطانه التى احبتني) ...انا معرفش ايه اللى يخلي شيطانه تحب بني ادم ..دا على اساسا انه مفيش رجاله عندنا ولا ايه
* ايه هوايتك المفضله ؟
- الوشوشه
* طب ايه الهوايه اللى انت بتحبها في البشر؟
-كل هواياتهم
* ايه اكتر مكان بتحب تروحه؟
- ستاد القاهره الدولي
* اشمعنى؟
- لا اصله احساس جميل لما يكون فيه 100 الف متفرج وكلهم بيشتموا بصوت واحد شتايم لو انا نفسي قلتها ماما تضربني
* بتحب مين في الزمالك؟
- كلهم
* وفي الاهلي؟
- انا بحب الاسم اللى بيقولوه عالاهلى دايما..الشياطين الحمر
* ايه رأيك في النداله؟
- انا احب النداله ..بس اللى زياده عن للزوم محبهاش...يعني مره واحد شيطان صاحبي عزمنا عالعشا انا واصحابي... واحنا قاعدين بناكل عنده في الشقه ..راح خارج منها وقفل الباب وشغل علينا قران
* طب ايه رأيك في الخيانه؟
-ياه بتحصل معايا من البني ادمين كتير اوي ... تخيل واحد وقفت جنبه من ساعة ما كان فقير ومعفن..وساعدته لحد مابقى عنده فلوس في البنوك وفلوس مهربها بره ومركز حساس.. وبعد كل ده ادخل عليه مكتبه الفخم والاقي وراه صوره ضخمه مكتوب عليها ( هذا من فضل ربي)
* انت متغاظ بقى؟
- انا تعبت خلاص يابوحميد .. شياطين الانس غلبوني بالشر بتاعهم تخيل اني بعتبر رمضان شهر المصيف بتاعى اللى برتاح فيه من ظلم البني ادمين...امتى بقى ادخل النار عشان ارتاح من امثالكو
***** وانقطع الخط فجأه لاسمع رساله تقول ..هذا الرقم قد يكون محروقا بناء على طلب صاحبه

تفطس من الضحك

بجد شكرا ليك يا حازم

على فكرة يا جماعة حازم يبقى اخويا
هو فى كلية الاعلام
و اصغر منى بسنة واحدة

هههههههههههههههه
جامده جدا يا حازم تسلم ايدك

واهلا بيك معانا ونورتنا يا برنس

- فيلم (الشيطانه التى احبتني) ...انا معرفش ايه اللى يخلي شيطانه تحب بني ادم ..دا على اساسا انه مفيش رجاله عندنا ولا ايه



انا لسة كنت هقول مين العميل ده


ههههههههههههههههههههههههه
اخبارك يابو الاحازيم

عامل ايه يا ضايع

ههههههههههههههههههه

منورنا يا كبير

ههههههههههههههههههههههههه حلوة جدا شكرا على التوبيك الرائع 

هههههههههه
حلوه اوووووووووووووووووى
تسلم ايدك