دعوه للرجوع الى حضن ربنا (ماتستغربوش العنوان ادخلو واقروا الاول )

السلام عليكم ورحمه الله وبركاته



ازيكم يا جماعه ...ان شاء الله تكونوا بخير وصحه وسعاده دائما يارب

طبعا انا عارف ان فيه منكم استغرب العنوان وكلمه حضن ربنا

بس اصبروا وانتوا هتفهموا كل حاجه

بس اولا انا عاوز اتكلم على نقطه انا بسمع ناس كتير للاسف بتقول انا ربنا مابيحبنيش وفيه ناس بتقول انا ربنا غضبان عليا وفيه ناس للاسف بتقول انا ماعنديش ثقه فى ربنا ...اه بجد فيه ناس بتقول كده

واحب اقول للى بيقول ان ربنا مابيبحبهوش وغضبان عليه اقوله لا كلامك غلط ربنا بيحبك حب كبير جدا اكتر من حب والدتك ليك
والدليل على كده شوف كام مره غطلت وربنا سترك ...كام مره كان ممكن يحصلك فيها اى اذى وربنا حفظك وحماك
لو ربنا مابيحبكش مكنش يحميك ...لو ربنا مابيحبكش ما كنش يحبلك الخير
ممكن تقول طب ليه ربنا كل شويه بيبتلينى وبيحصلى مصايب كتير هقولك ربنا لما بيحب حد بيبتليه عارف ليه ...؟
عشان سببين اولا عشان يشوف انت بتحب ربنا ولا لا لأنك لو بتحبه هتصبر وتقول الحمد لله وتشكر ربنا بمعنى اخر اختبار
والسبب التانى عشان يديك كميه ثواب وحسنات كبيره جدا ولو صبرت صدقنى منزلتك عند ربنا بتعلى كل ما بيجيلك بلاء وتصبر منزلتك ودرجتك بتعلى
هتقولى طب ماشى انا انا بحمد ربنا وبصبر بس برضه الابتلاء موجود او بيزيد هقولك ليه اول حاجه لازم تفكر فيها
انت لما بتصبر بتصبر عشان ترضى ربنا ولا بتصبر كده وخلاص دى حاجه ولما بتشكر ربنا هل بتقولها ككلمه ولا بتقولها من قلبك وبتقصد معناها
لو بتقولها ككلمه ومابتقصدش معناها يبقى ربنا عاوزك ترجعله وتشكره وتحمده وتحس بالنعمه اللى انت كنت فيها قبل الابتلاء
ولو بتقولها من قلبك وعاوز ترضى ربنا والابتلاء موجود او بيزيد ده بيبقى هنا ربنا صدقنى بجد عاوز يرفع منزلتك اكتر واكتر وبيبقى عاوزك تصبر اكتر
وفى نفس الوقت بيعلمك الصبر

طيب واللى بيقول انو مابقاش يثق فى ربنا ..ليه ياعم كده يقولك انا ياما كتير بدعى ربنا وربنا مابيقبلش
هسالك انت بتدعى ربنا من قلبك وبتضرع ورجاء ولا لا
وهل بتلح فى الدعاء ولا لا ...وعلى فكره دعاءك ده حتى لو ما استجابش بتاخد عليه ثواب
دلوقتى انت لو مابتدعيش ربنا من قلبك ومش بتضرع ورجاء يبقى طبعا الدعاء مش هيستجاب الدعاء لازم يكون فيه عنصر الاحساس
اما بقى لو بتدعى من قلبك وبتضرع واستوفيت كل حاجه وربنا ما استجابش ...يبقى ماتزعلش بالعكس ده انت تفرح
هقولك ليه اولا ربنا بيحوشلك الدعاء ده كله لحد يوم القيامه يوم لا ينفع فيه مال ولا بنون
وعارف يعمل ايه يحولك الدعاء اللى متحوش ده كله لحسنات يضيفها لميزان حسناتك يوم القيامه
يعنى كده كده انت الكسبان ...فانا راضى ذمتك عاوز ربنا يستجيب الدعاء فى الدنيا الفانيه
ولا يحوشهولك احسن ويخليه حسنات ويضيفهالك يوم حسابك ويمكن تكون هيا السبب اللى تدخلك الجنه
ده غير كده كمان ودى انا سمعتها من شيخ او داعيه اسلامى تقريبا عمرو خالد ان ربنا بيانس بالحاح العبد فى دعاء
عارف يعنى ايه الجمله دى ان ربنا يأنس بيك وبيبقى حابب انو يسمع دعاءك دى حاجه كبيره قوى
فانا مش عاوزك تزعل عشان بتدعى وربنا مابيستجيبش وعلى فكره ربنا بيعمل اللى فى مصلحه الواحد ودى حاجه مافيهاش شك خالص
وصدقنى مهما كان الواحد بيعمل ذنوب ودعى ربنا من قلبه صدقى مابيقفلش باب الدعاء فى وشه ربنا رحيم جدا وحنين جدا
وانا الدليل على كده
انا الحمد لله كنت ملتزم ومواظب على الصلاه
لحد مادخلت الكليه بصراحه سبتها مكنتش بصلى خالص ولو حد عاوز يعرف ليه هقوله كنت حسيت زى مايكون زهقت او مليت
المهم فى فى اول ترم ليا فى الكليه شلت مواد الترم كلها معادا ماده واحده والترم التانى شلت ماده فيه وعدت السنه وبرضه مكنتش بصلى
خلصت امتحانات الترم الاول وكان فيه ممواد كنت هشيلها بقيت ادعى ربنا كل يوم واترجاه
لحد ما النتيجه طلعت لقيتنى ناجح فى المواد كلها
ده غير انى فى اول سنه ليا فى الكليه كنت متعقد من ماده اسمها محاسبه وفى الترم التانى كانت صعبه وكان الدكتور رخم وانا مكنتش فاهمها اصلا
ودخلت الامتحان صدقونى سبت الورقه فاضيه ماعدا خاجات بسيطه كتبتها
ودعيت ربنا واترجيته انى ما اشيلش الماده بالذات
وبرضه ربنا استجاب وماشيلتهاش ونجحت فيها
فمهما كنت بتعمل معاصى ربنا مش هيكرهك بالعكس ده بيبقى عاوزك ترجع ليه صدقنى
ومهما كنت بتعمل معاصى واحتجت مساعده ربنا صدقنى هيساعدك ربنا مابيخذلش حد ابدا لا اللى بيطلب مساعدته بيساعده
وصدقنى فضلت كده مابصليش لحد الترم اللى فات بدات التزم لحد ما الحمد لله التزمت تانى
وفى خلال الفتره اللى اللى مكنتش فيها بصلى كنت ببقى عاوز اصلى بس للاسف الشيطان كان بيلعب فى دماغى احلى لعب
واكتر من مره كنت بقول يارب انا خلاص تبت وهرجع اصلى تانى
وبرضه ولا كانى قلت التوبه دى لدرجه ان كلمه توبه قلتها اكتر من 14 مره تقريبا
لحد ماقلت خلاص هيا حرب بينى وبين ابليس ونفسى
ولازم افوز فيها لأنى لو فزت هفوز باعظم حاجه ممكن الواحد يتخيلها هيا رضا ربنا عليه
وعشان اثبتلكوا اكتر ان مهما الواحد عمل ذنوب ربنا برضه مابيكرهوش
انا كنت فى مره راكب المترو وكنت قاعد مش ناحيه الرصيف اللى بقف عليه لا ناحيه القضبان التانى وفى وسط الطريق
طلعت دراعى كله وبطوله من الشباك ونسيت خالص ان ممكن مترو يعدى ويقوم واخد دراعى دع معاه
ووالله العظيم فجاه الاقى ايدى دى زى مايكون بتتزق وتدخل الشباك بتاعى
واول ما ايدى وصلت حرف الشباك لقيت المترو اللى بيعدى من جنبى
ووقتها انا برضه مكنتش بصلى
عرفتوا بقى ان بقى ربنا صبور جدا ورحيم جدا
ربنا على فكره وده فى حديث نبوى ممكنم يغفر اى ذنب ايا كان
سواء قتل او زنا او ربا
ودول من الكبائر
ربنا بيغفرهم تصدقوا بقى... بس الحاجه الوحيده اللى مافيهاش غفران حتى لو الشخص تاب هيا الاشراك بالله او الكفر بيه والعياذ بالله
فدلوقتى مفيش حاجه اسمها ربنا غضبان عليا او مابيحبنيش
ده فيه حاجه كمان وده من حديث عن الرسول ان ما من شوكه تصيب البنى ادم الا وقد حطت له خطيئه او سيئه
على فكره ده مش الحديث بالنص لأنى مش فاكر النص للاسف
المهم معنى الحديث ده ايه ان اى ابتلاء بييجى للبنى ادم مهما كان صغير بسبب الابتلاء ده فيه سيئات وخطايا بتتمسح
فلو خدتوا بالكوا وده من رحمه ربنا بينا
ان الناس اللى بتعمل ذنوب كتير تلاقى كتير منها بيعيا كتير
وبالذات لو حد مثلا سنه كبير
لكن ممكن العيا ده يكون عقاب
يعنى ربنا بيبقى عاوز يعاقبك فى الدنيا عشان يخفف عقابك فى الاخره
ياجماعه ربنا ده رحيم جدا
تعرفوا انا هقولكم على حاجه سمعتها تقريبا من عمرو خالد
بس انا سمعتها من شيخ او داعيه اسلامى كان بيحكى ان هييجى فى يوم القيامه ساعه الحساب
هيبقى واحد بيتحاسب وسيئاته قد حسناته
يعنى لو فيه حسنه واحده زياده هيدخل الجنه
وهيبقى فيه واحد تانى كله سيئات ومعندوش غير حسنه واحده
يقوم قايل لربنا يارب اعطه هذه الحسنه فانها لن تنفعنى فانا فى النار
فاعطها له ليدخل الجنه
يقوم ربنا قايل وهل ستكون رحيم بيه اكتر منى فيدخلهم هما الاتنين الجنه
شفتوا بقى اد ايه ربنا جميل وحنين ورحيم
احنا للاسف علاقتنا بيه سطحيه
فناخدها على انه اله واحنا عبد
وعلينا طاعته
يعنى هبسطها بناخدها علاقه رسميه بينا وبينه
ليه ياجماعه
ربنا بيحب اللى يشتكيله همه واللى يكلمه ويقوله يارب
ويدعى
ربنا مش مجرد اله خالقنا وهيحاسبنا وبس
لا ياجماعه ربنا ده كل حاجه فى حياتنا هوا كل حاجه بالنسبالنا
وصدقنى والله هيسمعك
انا لما ببقى مضايق او مخنوق صدقونى بقعد مع نفسى اشكى همى لربنا واكلمه
وصدقونى بجد بحس انو بيكلمنى وبيواسينى
يعنى هقولكوا انا لما باجى اكلمه او اشكيله همى والله بجد بحس برعشه فى جسمى كله
وبحس براااحه غريبه
ده انا من كتر مابقيت بحب ربنا والله بقلوهاله
باجى ساعات بقول بحبك اوى يارب
وبرضه بحس برعشه
انا بحس ان الرعشه دى نتيجه رده عليا او احساسه بيا
هيا ليها علاقه
خلوا علاقتكوا مع ربنا مش علاقه رسميه وخلاص لا خلوا فيها عاطفه وحب
كلموا ربنا وحسوا بيه
واشكوله همكوا والله بيسمع شكواكوا
ربنا مابيحبش ياذى حد ربنا على قد ماهوا قادر انو يدمر الكون ده فى غمضه عين شوفوا القوه بقى والغضب اد ايه
رحمته بقى اكبر من كده بكتييييييييييييييييير وبمراحل
وربنا قالها ان رحمتى غلبت غضبى
ربنا بيدى فرص للبنى ادم كتييييييييييير قوى وبيفضل يديله فى فرص عشان يتوب
لأن ربنا عارف الحساب ويوم القايمه هيبقى ازاى وربنا مش عاوزنا ندخل النار بالعكس ده عاوزنا ندخل الجنه
والدليل على كده خلى السيئه هيا السيئه بس
والحسنه بعشره
يعنى انت عملت عملت حاجه كويسه بتاخد عليها حسنه
لا مابتاخدش حسنه واحده بس بتاخد 10
ربنا عاوز ميزان حسناتنا يبقى تقيل قوى اتقل من ميزان السيئات بكتيييييييييير
ده غير ان ربنا خلى حاجات كتييييييييييييييييييييييييييييييييييييييييييييييييييييير
نعملها ناخد عليها حسنات
وحاجات انت لايمكن تتخيلها وبتعملها من غير ما تحس
يعنى هقولك ابتسامتك فى وجه اخيك المسلم صدقه
الصدقه دى مش عليها حسنات
شوف بقى فى خلال اليوم الواحد ابتسمت فى وش كام مسلم
لو قلنا عشره مثلا
اضرب عشره فى عشره
لأن كل واحد عليه 10 حسنات لأن الحسنه بعشره
يبقوا كام حسنه
100 حسنه

يتبع فى الردود

تخيل ده من الابتسامه بس
وحاجه كمان لما مثلا بتلاقى صاحبك او صاحبتك مضايقه وزعلان
وتيجى انت تكلمه او تكلمها وتعرف الزعل ده
وتهديه وتخليه ينسى الزعل ده وتخليه يضحك كمان
دى عليها ثواب كبيييييييييير قوى
كام واحد بيعمل كده كتييييييييييير
ومابنحسش
ولما صاحبك يبقى مهموم وتخليه يفضفض وينسى همومه ويرجع لحالته الطبيعيه تانى دى عليها ثواب كبير قوى
ولما يبقى مكروب وعنده مشكله وانت تقف جنبه تحلهاله
دى عليها ثواب كبير جدا
ياااااااااااااااه انا مهما عديت احنا تقريبا يومنا كله مابيعديش الا لما يكون معانا قدر لاباس بيه من الحسنات
بالرغم من السيئات الكتير برضه اللى بنعملها
فتخيلوا بقى لما ربنا يعمل كل ده عشان يبقى معاك حسنات كتير ده غير شفاعه سيدنا محمد
ده غير شفاعه الصيام
وشفاعه القران اللى بتقراه فى رمضن على الاقل
يبقى ايه
يبقى ربنا عاوز ايه من البنى ادم
يبقى ربنا عاوز يدخله الجنه بشتى الطرق
وحاجه كمان ودى عن حديث عن الرسول لما واحد يموت
حلو وفيه تلاته شهدوا ان الميت ده كان صالح وكان كويس وما اذاش حد
بيدخل الجنه
يااااااااااااااااااااااااه يارب قد ايه انت جميل واد ايه انت رحيم واد ايه حنين على الواحد
انت اللى بتبقى موجود وبتفرجها علينا وتحس بينا لما الدنيا بتضيق بينا
انت اللى بتفرج همومنا وكربنا
يبقى ربنا ده ايه
يبقى ربنا ده يستاهل اننا نعامله بالطريقه الرسميه دى او الطريقه الجافه دى كل واحد فينا بيبقى قايم يصلى كانه رايح عزا
ليه ياعم ده انت هتقابل ربنا وهتقف بين اديه
وتلاقى الواحد بيصلى ورحته عرق وحاجه زفت
وتلاقيه رايح فرح لا بسلك اللى على الحبل واشيك حاجه عنده
يعنى رايح لبنى ادم وتعمل كده
ولما تروح لربنا اللى خلقك واللى بيحن عليك ويرحمك
تروحله بالمنظر ده
فيه اايه ايه كده لما تتشطف كويس وتلبس حاجه نضيفه
وتحط برفان كمان
او بلاش برفان مسك او عنبر
اه عادى والله
انت بتتزين لأعظم واحد هتقابله فى حياتك
هتقولى بس انا مابشوفوش هقولك اه
بس هوا بيشوفك
يبقى ازاى تحب انو يشوفك بالمنظر ده
مش بقولكوا علاقه رسميه وجافه
انتوا طبعا عارفين ان ربنا هيظهر لاهل الجنه انا بقى متخيل انى لو دخلت الجنه ان شاء الله
وربنا ظهر وشوفته هوا طبعا كل الناس هتسجد
انا بقى حاسس انى هجرى عليه احضنه
والله بجد رغم انى عارف انها مش هتحصل بس ده من كتر حبى فيه انا حبيت ربنا من غير ما اشوفه
وكلنا لازم نحبه ونعشقه كمان مع اللى بيعملوا معانا ده
يعنى هقلكوا على حاجه حد فينا يقدر يزعل والدته
لا طبعا يالهوى دى كانت تبقى كارثه
فمابالكوا بقى بربنا اللى احسن من والدتك واللى بيحبك اكتر منها واللى بيحن عليك اكتر منها واللى بيحفظك ويحميك
شوف كام مره بنزعله فيها وكل يوم
اذا لما يكن ينزعله فى اليوم اكتر من مره
ورغم كده بيصبر علينا وبيرحمنا وبيفضل يحبنا برضه
يبقى احن ايه
ظلمنا نفسنا ولا لا
ربنا مايستاهلش مننا كده
ليه نزعله وليه نعصيه رغم اننا لو اطعناه يااااااااااااااه على البركه والراحه النفسيه والرزق اللى هيجيلك
مالوش حدود هتحس انك مش شايل هم اى حاجه خالص
لأن ربنا موجود جنبك وهيساعدك وهيدافع عنك
يبقى ليه مانطيعوش ليه مانسمعش كلامه
ربنا فاتحلنا بابه قدامنا على مصراعيه
وقدامنا باب الشيطان بنسيب باب ربنا وبنروح لباب الشيطان بنسيب اللى بيحبنا واللى بيرحمنا وبنروح للى هياذينا واللى عمره ماهيفكر فى مصلحتنا اصلا
ربنا اللى فاتح ذراعيه وبيقولنا تعالوا عندى وانا احميكوا واحفظكوا
انا اللى بحبكوا بجد
وانا بنقول لا مش جايين وبنرفض
وربنا ينادى علينا تانى واحنا بنرفض
ليه ياجماعه نعمل كده مانرجع لحضن ربنا الدافىء الجميل الحنين اللى هتحس فيه بالامان والراحل والسكينه
فيها ايه لو قلنا لابليس لا
ايوه لا
مش صعبه
وقلنا لا هنرجع لحبيبنا اللى مالناش غيره ربنا الله
ونقعد فى طاعته وتحت حمايته ورحمته
ليه مانعملش كده ايه حضن ربنا الجميل ده مايستاهلش اننا نستحمل
مايستاهلش اننا نبعد عن كل مايغضبه
مايتاهلش عشان ماناذيش نفسنا
انا عارف ان كلنا بقينا مدمنين ذنوب
بس معلش بالاراده والعزيمه هنرجع لحضن ربنا
انا ماقلتش اننا هنبقى كاملين
لا الكمال لله وحده
بس نوصل لقصى درجه من الطاعه ومفيش حاجه بتيجى مره واحده
يعنى برضه الاسلام دين يسر لا عسر
وربنا قلها انما يريد بكم اليسر لا العسر
فاحنا وواحده واحده هنرجع لربنا وكل ذنب بنبطله او بنقلل منه بيقربنا من حضن ربنا اكتر
اللى هيفضل فاتح ذراعيه لنا دائما
نشوف ايه الذنوب اللى بنعملها ونكتبها فى لسته
ايوه يلا هات ورقه وقلم وفكر وشوف ايه الذنوب اللى انت بتعملها
واكتبها كلها تحت بعض من الصغير للكبير من الذنب الاصغر والاسهل للاكبر والاصعب
يعنى مثلا الكذب فيها ايه لو مانكدبش ودى حاجه سهله جدا اننا نمنع نفسنا منها
مالهاش الصراحه والحقيقه ده غير كده لو خدت بالك هتلاقى الكذب بيوقعك فى مشاكل اكتر من الصراحه
نيجى لحاجه تانيه دايما بنجيب فى سيره بعض للاسف وياريت بنجيب فى السيره بالخير
لا بالشر وبنقعد نذم فى الواحد ولما يبقى قدامه يبقى اهى ياجبيبى واخر تمام غلط
انت شايف ان البنى ادم ده فيه عيب ماتقوله فى وشه
ولو لازم تجيب فى سيره حد وهوا مش موجود ياريت يبقى بالخير يعنى اذكر محاسنه مش عيوبه
نييجى للهم الكبير

يتبع